Ózbekstanda Jýrnalıstıka ýnıversıteti quryldy
ASTANA. QazAqparat - Ózbekstannyń joǵary oqý oryndary júıesi jańa bilim ordasymen tolyqty. Ózbekstan prezıdenti Shavkat Mırzıeev 24 mamyrda Jýrnalıstıka jáne buqaralyq kommýnıkatsııa ýnıversıtetin qurý týraly qaýlyǵa qol qoıdy, dep habarlaıdy QazAqparat ÓzAA-ge silteme jasap.
Ózbekstannyń joǵary jáne arnaıy orta bilim berý júıesinde jýrnalıstıka jáne buqaralyq kommýnıkatsııalar ýnıversıtetin qurý týraly sheshim jahandaný dáýirinde jýrnalıstıkanyń erekshelikterin, onyń tarıhı jetistikterin, qazirgi jaǵdaıy men perspektıvalaryn jan-jaqty zerdeleý maqsatynda qabyldandy.
Jańa oqý orny bilim berý úderisine zamanaýı aqparattyq tehnologııalar men qashyqtyqtan oqytýdyń ádisterin engize otyryp, bilikti jýrnalıst kadrlardy daıarlaýmen aınalysatyn bolady. Sondaı-aq, bilim oshaǵy magıstratýra jáne doktorantýra baǵdarlamalary boıynsha bolashaq jas túlekterdi sheteldik oqý oryndaryna jáne ǵylymı ortalyqtarǵa jiberý arqyly ýnıversıtettiń pedagogıkalyq áleýetin arttyrmaq.
Aldyn ala belgili bolǵandaı, úmitkerler jańa ýnıversıtetke testileý jáne shyǵarmashylyq emtıhan (áńgimelesý) negizinde qabyldanady.
