Ózbekstanda júk kóligi men jolaýshylar poıyzy soqtyǵysty
TAShKENT. QazAqparat – Ferǵana oblysynda júk kóligi men jolaýshylar poıyzy soqtyǵysyp, bir adam kóz jumdy, dep habarlaıdy QazAqparat «Ýzbekıston temır ıýlları» AQ baspasóz qyzmetine silteme jasap.
«13 qazan saǵat 21:40-ta Bývaıda men Qoqand stantsııalary arasyndaǵy temirjol ótkelinde jol-kólik oqıǵasy boldy. GAZ-53 markaly júk kóligi jabyq turǵan shlagbaýmdy aınalyp ótpek bolǵanda, №62 «Tashkent – Ándijan» baǵytyndaǵy jolaýshylar poıyzynyń lokomotıvimen soqtyǵysqan.
Oqıǵa saldarynan júk kóliginiń júrgizýshisi qaza tapty. Al jolaýshylar arasynda zardap shekkender joq. Sondaı-aq, lokomotıv pen jolaýshylar poıyzynyń alǵashqy vagonyna zaqym keldi. Oryn alǵan oqıǵadan keıin azamattarǵa jedel kómek kórsetilip, jolaýshylardy tıisti jerine basqa elektrovoz jetkizdi», - dep málim etti «Ýzbekıston temır ıýlları» AQ baspasóz qyzmetinen.
Oqıǵa saldarynan jolaýshylar poıyzy 42 mınýtqa keshikken. Qazirgi ýaqytta quqyq qorǵaý organdary jáne tıisti vedomstvolar atalǵan jol-kólik apatyna baılanysty tergeý jumystaryn júrgizýde.
