Ózbekstanda jynystyq sıpattaǵy qylmystar úshin úsh aıda 318 adam jaza arqalady

TAShKENT. KAZINFORM – Bıylǵy úsh aıdyń ishinde Ózbekstanda jynystyq sıpattaǵy qylmystar úshin 318 adam jaýapqa tartyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

«ÓR Qylmystyq kodeksiniń 41-1-baby boıynsha (Jynystyq qol suǵýshylyq) 318 adam ákimshilik jaýapkershilikke tartyldy. Olardyń ishinde 97 adamǵa aıyppul salynsa, 221-i ákimshilik qamaýǵa alyndy», - dep málim etti Ózbekstan Joǵary sotynyń baspasóz hatshysy Azız Abıdov.

Vedomstvonyń deregine saı, Qylmystyq kodekstiń 141-3-baby (Adamnyń ar-namysy men qadir-qasıetine nuqsan keltiretin jáne jeke basqa qatysty málimetterdi jarııa etý) boıynsha 40 adam qylmystyq jaýapqa tartylǵan. Atap aıtqanda, 13 adam bas bostandyǵynan aıyryldy, al 27 turǵynǵa ózge jazalar taǵaıyndaldy.

Eske salaıyq, byltyr Ózbekstanda jynystyq qol suǵýshylyq qylmystaryna qatysy bar 666 adamǵa túrli jaza kesilgen bolatyn.

Sondaı-aq, ústimizdegi jyldyń alǵashqy toqsanynda Ózbekstanda turmystyq zorlyq-zombylyq áreketterin jasaǵan 4 477 adam ákimshilik jáne qylmystyq jaýapkershilikke tartyldy.