Ózbekstanda jylyna 10 myń elektromobıl qurastyratyn zaýyt iske qosylady

Keler jyly Ózbekstanda jylyna 10 myń elektromobıl jasap shyǵarýǵa qaýqarly zaýyt iske qosylady. Atalǵan joba Ózbekstan prezıdenti Shavkat Mırzıeevtiń qatysýymen ótken avtomobıl jasaýdy damytý jónindegi keńeste tanystyryldy, dep habarlaıdy Kazinform agenttiginiń menshikti tilshisi.

Ózbekstan basshysynyń baspasóz qyzmetinen málimdegendeı, keńeste salanyń aldaǵy josparlary men mindetteri talqylandy. Olardy oryndaý nátıjesinde 2030 jylǵa qaraı shyǵarylatyn kólikterdi sanyn 1 mıllıonǵa deıin arttyrý kózdelgen.

Keıingi jyldary Ózbekstanda avtomobıl óndirisi úsh ese ósken. Osy jyldyń sońyna qaraı jasalǵan temir tulparlardyń jalpy kólemi 415 myńǵa jetedi dep kútilýde. Búginde bul memlekettegi 8 zaýyt jeńil kólikpen qatar, jolaýshylar, júk, aýyl sharýashylyǵy jáne arnaıy tehnıkanyń ondaǵan túrin shyǵaryp jatyr.

«Qazirgi tańda álemdegi jetekshi avtoóndirýshiler elektromobıl óndirisine basymdyq berip jatyr. Eger otandyq kásiporyndar osy salany ıgerý kórsetkishterin tómendetse, onda bolashaqta olardyń naryqta laıyqty oryn alýy qıyn bolady», - dep atap ótti Shavkat Mırzıeev.

Jıynda Ózbekstan basshysyna osy baǵytta qolǵa alynǵan birqatar joba tanystyryldy.

«Kelesi jyly jylyna 10 myń elektromobıl shyǵarýǵa qaýqarly avtozaýyt iske qosylady dep josparlanýda», - delingen prezıdenttiń baspasóz qyzmeti tartqan habarlamada.

Prezıdent elektromobıl óndirisine erekshe nazar aýdaryp, olarǵa qajetti quramdas bólikterdiń shyǵarylýyn jolǵa qoıýdy tapsyrdy.