Ózbekstanda jemqorlyqtyń aldyn alý úshin sheneýnikterdi túrmelerge aparý tájirıbesi engizildi
TAShKENT. KAZINFORM – Ózbekstanda jemqorlyq qylmystarynyń aýyr saldaryn kórsetý maqsatynda memlekettik qyzmetshilerdi túrme men tergeý ızolıatorlaryna aparý tájirıbesi engizile bastady, dep habarlaıdy Kazinform agenttiginiń Tashkenttegi menshikti tilshisi.
Bastamany Sybaılas jemqorlyqqa qarsy is-qımyl agenttigi men Іshki ister mınıstrligi birlesip iske asyryp jatyr. Mundaı alǵashqy sapar 17 maýsymda birneshe memlekettik vedomstvonyń qyzmetkerlerine uıymdastyryldy. Sheneýnikter tergeý ızolıatory jáne túrmelerdegi kúdiktiler men sottalǵandardy ustaý jaǵdaılarymen tanysty.
Buǵan qosa olar sybaılas jemqorlyq qylmystary úshin sottalǵan adamdarmen kezdesti. Áńgimelesý barysynda sheneýnikterge sottalǵandardyń zańǵa qaıshy áreketteri olardyń óz ómirine jáne kásibı qyzmetine, qoǵamdyq mártebesine qalaı áser etkeni týraly mysaldar aıtyldy.
Sybaılas jemqorlyqqa qarsy agenttiktiń málimetinshe, mundaı is-sharalar memlekettik qyzmetshilerdiń sanasynda jemqorlyqqa tózbeý qaǵıdatyn qalyptastyrý jáne zań ústemdigin nyǵaıtýǵa baǵyttalǵan.
Aldaǵy ýaqytta osyndaı profılaktıkalyq saparlar ózge de mınıstrlik qyzmetkerleri úshin turaqty negizde uıymdastyrylady
Eske salaıyq, byltyr Ózbekstanda jemqorlyqqa barǵan 252 ákimdik qyzmetkeri qylmystyq jaýapqa tartyldy.
Buǵan deıin habarlaǵanymyzdaı, 2025 jyly Ózbekstanda 5 myńnan astam jemqorlyq qylmysy anyqtaldy. Aıta keteıik, 2024 jyly Ózbekstanda jasalǵan jemqorlyq qylmystary memleketke $228 mln zalal keltirdi.
