Ózbekstanda jemqorlyq úshin sottalǵandardyń reestri qurylady
TAShKENT. KAZINFORM – Ózbekstan prezıdenti Shavkat Mırzıeev «Sybaılas jemqorlyqqa qarsy qosymsha sharalar týraly» zańǵa qol qoıdy, dep habarlaıdy Kazinform agenttiginiń Tashkenttegi menshikti tilshisi.
Qujatta kórsetilgendeı, endi sot sheshimimen sybaılas jemqorlyq qylmysyn jasaǵany úshin kináli dep tanylǵan adamdardyń reestri qurylady. Ony júrgizýge Іshki ister mınıstrligi men Sybaılas jemqorlyqqa qarsy is-qımyl agenttigi jaýapty bolady.
Sot úkimi zańdy kúshine engennen keıin sottalýshy týraly derek 3 jumys kúni ishinde tizimge engizilýge tıis. Bul azmattarǵa qatysty birneshe shekteý qoldanylady. Atap aıtqanda, olarǵa memlekettik qyzmetke ornalasýǵa jáne memlekettik nagradalar alýyna tyıym salynady.
Sonymen qatar reestrge engizilgender memlekettik organdar men vedomstvoaralyq qurylymdar janyndaǵy Qoǵamdyq keńesterge múshe bola almaıdy. Buǵan qosa, olardyń memlekettik kompanııalar men oqý oryndarynda basshylyq laýazymdarda jumys isteýine ruqsat etilmeıdi.
Eske salaıyq, Ózbekstanda jemqorlyqtyń aldyn alý úshin sheneýnikterdi túrmelerge aparý tájirıbesi engizildi.
Buǵan deıin habarlaǵanymyzdaı, byltyr Ózbekstanda jemqorlyqqa barǵan 252 ákimdik qyzmetkeri qylmystyq jaýapqa tartyldy.
2025 jyly Ózbekstanda 5 myńnan astam jemqorlyq qylmysy anyqtaldy. Al 2024 jyly Ózbekstanda jasalǵan jemqorlyq qylmystary memleketke $228 mln zalal keltirdi.
