Ózbekstanda 4 jasar qyzǵa balabaqshada zorlyq jasaldy degen kúdikpen is qozǵaldy

Ózbekstan balalar ombýdsmeniniń málimdeýinshe, Tashkent oblysy Keles qalasynda turatyn Q.T. óziniń 2019 jyly týǵan qyzyna balabaqshada jynystyq tıisý oryn alǵanyn aıtyp, shaǵym túsirgen, dep habarlaıdy Kazinform.

Osy ótinishti Bas prokýratýramen birlesip zerdeleý nátıjesinde Keles qalasyndaǵy jekemenshik balabaqshada qyzǵa jynystyq tıisý faktisine baılanysty Ózbekstan Qylmystyq kodeksiniń 129-baby (on alty jasqa tolmaǵan adamǵa qatysty ádepsiz áreketter) boıynsha qylmystyq is qozǵaldy.

Qazir Tashkent oblystyq ІІB TB tarapynan aldyn ala tergeý amaldary júrgizilýde.

Sonymen qatar, Z.B. turyp jatqan úıinde, 2023 jyldyń 1 jeltoqsanynan bastap tıisti ruqsat qujatyn almaı, lıtsenzııasyz balabaqsha ashqany belgili boldy.

Tashkent oblysynyń sanıtarlyq-epıdemıologııalyq tynyshtyq jáne qoǵamdyq densaýlyq basqarmasy atalǵan úıdi teksergen kezde, munda sanıtarlyq erejeler óreskel buzylyp, balabaqshada jumys istegen G.Q. men Z.B. medıtsınalyq tekserýden ótpegeni anyqtaldy.

Qylmystyq isti tergeý barysynda azamat Z.B.-nyń lıtsenzııasyz mektepke deıingi bilim berý mekemesin ashyp, jumys isteýine de quqyqtyq baǵa beriledi.

«Bul qylmystyq isti tergeýdi oblys prokýratýrasy, Bas prokýratýra qadaǵalap, bala múddesine qatysty Balalar ombýdsmeniniń baqylaýyna alyndy», - delingen habarlamada.