Ózbekstanda jeke tulǵalardyń shetelden taýar ákelýine shekteý kúsheıtildi
TAShKENT. Kazinform — Ózbekstanǵa ushaqpen kelgen jeke tulǵalar qazir quny 2000 dollarǵa deıingi taýarlardy, al poıyzben kelgender quny 1000 dollarǵa deıingi taýarlardy baj salyǵynsyz ákelýge quqyly. Úkimet qaýlysymen 1 mamyrdan bastap bul shekteý sáıkesinshe 1000 jáne 500 dollarǵa deıin tómendeıdi.
Ózbekstan úkimeti ushaqpen jáne poıyzben keletin jeke tulǵalardyń jeke, kommertsııalyq emes maqsattary úshin respýblıkaǵa ákelinetin taýarlaryna baj salyǵynsyz ákelý tarıfterin tómendetti.
Premer-mınıstr qol qoıǵan qaýlyǵa sáıkes, 2025 jyldyń 1 mamyrynan bastap taýarlardy bajsyz ákelý normalary kelesideı belgilenedi:
áýe kóliginde — 1000 dollar (qazirgi ýaqytta 2000 dollar);
temirjol jáne sý kóliginde — 500 dollar (qazirgi ýaqytta 1000 dollar);
avtokólik (jaıaý) ótkizý pýnktteri arqyly — 300 dollar (ózgerissiz);
halyqaralyq kýrerlik jóneltilimder arqyly — aıyna 200 dollar (qazir toqsanyna 1000 dollar);
halyqaralyq poshta arqyly — 100 dollar (ózgerissiz).
Kommertsııalyq emes maqsatta taýarlardy temir jol jáne sý kóligimen jáne avtomobıl ótkizý pýnktteri arqyly ákeletin tulǵaǵa, eger adam shet memlekette 2 táýlikten az, al áýe kóliginde 3 táýlikten az bolsa, bajsyz ákelý normalary qoldanylmaıdy dep belgilendi. Bul rette bul taýarlar bajsyz ákelý normasynan asyp ketken dep tanylady jáne taýarlardyń tolyq qunynan biryńǵaı kedendik tólem alynady.
Balama quny 5 000 AQSh dollaryna deıingi taýarlardy, eksporttyq kedendik bajdar salynatyn taýarlardy qospaǵanda, jeke tulǵalar respýblıkadan kedendik deklaratsııany usynbaı ákete alady.
Sondaı-aq qujatta kedendik quny men sany ımport protsesinde bólek baqylaýǵa jatatyn taýarlardyń tizbesi bekitildi. Tizimge 70 túrli taýar túrleri kiredi. Olarǵa turmystyq tehnıka, azyq-túlik, ártúrli kıim-keshek pen aıaq kıim, tazalaý jáne jýýǵa arnalǵan zattar, oıynshyqtar, dóńgelekter, metall buıymdar jatady.
— Іshki ister mınıstrligi men Ulttyq ulan shekaralyq keden beketterinde azamattardyń ýákiletti memlekettik organdardyń laýazymdy adamdarynyń zańdy talaptaryna baǵynbaýyna, qarsylyq kórsetýine, qoǵamdyq tártipti buzýyna jol bermeý maqsatynda Keden komıtetimen yntymaqtastyq ornatsyn, — delingen qaýlyda.
Eske sala keteıik, Ózbekstan sheteldikter úshin «altyn vıza» engizýdi josparlap otyr.