Ózbekstanda jeke klınıkalarǵa adam aǵzasyn transplantatsııalaýǵa ruqsat berilmek
TAShKENT. KAZINFORM – 2027 jyldyń 1 mamyrynan bastap ulttyq nemese halyqaralyq akkredıtteýden ótken jeke klınıkalarǵa adam aǵzasyn transplantatsııalaýǵa ruqsat etiledi. Tıisti jarlyqqa el prezıdenti Shavkat Mırzıeev qol qoıdy, dep habarlaıdy Kazinform agenttiginiń Tashkenttegi menshikti tilshisi.
Qujatta jazylǵandaı, adam aǵzalaryn jáne tinderin transplantatsııalaý kezinde zańnama talaptaryn saqtaý medıtsınalyq qyzmettiń lıtsenzııalyq shartyna engiziledi. Jeke klınıkalar Densaýlyq saqtaý mınıstrligine naýqastar men donorlar týraly derekterdi únemi usynýǵa mindetteledi.
Óz kezeginde vedomstvo molekýlalyq-genetıkalyq zertteý júrgizýge qoıylatyn talaptardy jáne transplantatsııa úshin suralatyn taldaýlardyń tizbesin bekitedi.
Memlekettik bıýdjetti josparlaý kezinde osyndaı ota jasaıtyn jeke klınıkalardyń patsıentterin dári-dármekpen qamtamasyz etý máselesi eskeriledi.
Naýqastyń ómiri men densaýlyǵyna zııan keltirgeni úshin ótemaqy tóleý, transplantatsııadan keıin adamdardy ońaltý tártibi jeke ázirlenedi.
Buǵan deıin habarlaǵanymyzdaı, Qazaqstanda 4,6 myńnan astam adam aǵza transplantatsııasyn kútip júr.
Eske salaıyq, bıyl Pavlodarda alǵash ret kózdiń qasań qabyǵy transplantatsııalandy.
