Ózbekstanda jaıaý júrgen adamdarǵa 1 mln sýmǵa deıin syıaqy beriledi
TAShKENT. QazAqparat - Ózbekstanda halyqtyń densaýlyǵyn saqtaý jáne aýrýdyń aldyn alýǵa erekshe mán berilip, «Salaýatty ómir salty» atty jańa platforma qurylady, dep habarlaıdy QazAqparat ÓzA agenttigine silteme jasap.
Taıaýda Ózbekstan Prezıdenti Shavkat Mırzıeevtiń jańa jarlyǵy shyqty. Onda salaýatty ómir saltyn ustaný, densaýlyqty kútý jáne kúndelikti shynyǵýǵa qatysty birqatar máseleler kóterilgen. Atap aıtqanda, halyq arasynda kúndelikti jaıaý júrý men júgirýdi nasıhattaý úshin qarjylaı syılyq berý qolǵa alynbaq.
«Salaýatty ómir salty» platformasynda 18 jastan asqan Ózbekstan azamattarynyń elektrondy ámııanyna belgili bir kólemde qarjy salyp otyrý, sol arqyly halyqty salaýatty ómir saltyn ustanýǵa yntalandyrý kózdelip otyr.
Bir táýlikte 10 myń jáne odan kóp qadam jaıaý júrgen adamǵa 3 myń sýmǵa deıin tólenedi. Bir aıda ár aýdan men qalada eń kóp jaıaý júrgenderge - 300 myń sýmnan, ár óńirde eń úlken qashyqtyqty jaıaý júrip ótken adamǵa - 500 myńnan, respýblıka boıynsha eń kóp jaıaý júrgen azamatqa - 1 mıllıon sým kóleminde syılyq berý josparlanǵan.
Jarlyqtyń mátinimen myna siltemede tolyq tanysýǵa bolady.
