Ózbekstanda jańajyldyq banket ótkizýge tyıym salyndy
TAShKENT. QazAqparat - Ózbekstanda memlekettik uıymdardyń jańajyldyq banket ótkizýine jáne bilim mekemelerinde Jańa jyl merekesin toılaýǵa tyıym salyndy, dep habarlaıdy QazAqparat eldiń densaýlyq saqtaý mınıstrliginiń baspasóz qyzmetine silteme jasap.
Ózbekstanda koronavırýsqa qarsy kúres jónindegi respýblıkalyq komıssııanyń qaýlysyna oraı, memleket úlesi bar kásiporyndarda merekelik jıyn ótkizýge tyıym salyndy. Odan únemdelgen qarjyny bilim berý, densaýlyq saqtaý, balalar úıi sekildi áleýmettik salalarǵa jumsaý usynylady.
Basqa uıymdar nemese jeke tulǵalardyń qoǵamdyq tamaqtandyrý oryndarynda 30 adamnan aspaıtyn jáne sanıtarııa-gıgıena jáne karantın talaptaryn qatań saqtaı otyryp mereke is-sharalaryn ótkizýine shekteý qoıylmaıdy. Biraq el azamattaryna Jańa jyldy úıde otbasymen toılaý usynylady.
Sondaı-aq mektepke deıingi uıymdarda, orta mektepter men joǵary oqý oryndarynda oqýshylardyń, tárbıelenýshilerdiń jáne stýdentterdiń qatysýymen jabyq jerde túrli merekelik is-shara men keshter uıymdastyrýǵa jáne ótkizýge tyıym salynady.
Oblys, aýdan jáne qala ortalyqtarynda Jańa jyl shyrshasyn ashyq jerge ornatý usynylady.
