Ózbekstanda janarmaı men gaz óndirisi tómendedi
TAShKENT. KAZINFORM – Qańtar-tamyz aılary aralyǵynda Ózbekstanda gaz - 7%, al janarmaı óndirisi 14%-ǵa tómendedi, dep habarlaıdy Kazinform agenttiginiń menshikti tilshisi.
Segiz aıda Ózbekstannyń iri kásiporyndary 28,9 mlrd tekshe metr gaz óndirdi. Bul ótken jyldyń sáıkes kezeńimen salystyrǵanda 1,2 mlrd tekshe metrge az.
Sondaı-aq, qamtylyp otyrǵan aralyqta kórshiles elde 770,3 myń tonna janarmaı óndirildi. Byltyr osy kezeńde Ózbekstannyń munaı óńdeý zaýyttary 898,3 myń tonna kólik otynyn shyǵarǵan bolatyn.
Bul rette Ózbekstan Túrkimenstan jáne Reseıden ımporttaǵan gaz úshin 885,9 mln dollar tóledi. Al kógildir otynnyń Qytaıǵa eksportynan túsken paıda 494,7 mln dollar shamasynda. Osylaısha, ımport pen eksport arasyndaǵy teris saldo 390 mln dollardan asty.
Gazdyń kólemi tómendegenimen, kórshiles memleket kómir óndirisin arttyrdy. Atap aıtqanda, ózbekstandyq shahterler segiz aıda 4,7 mln tonnadan astam qatty otyn qazyp aldy. Bul ótken jyldyń sáıkes kezeńine qaraǵanda 300 myń tonnaǵa artyq.
Eske salaıyq, buǵan deıin Ózbekstanda gaz óndirisi 3,1 paıyzǵa tómendegenin jazyp edik. Sonymen birge, taıaýda Tashkent oblysynyń ustazdarymen kezdesken kórshiles eldiń basshysy Shavkat Mırzıeev Ústirtte iri gaz ken orny tabylǵanyn málimdedi.