Ózbekstanda janarmaı beketinde bolǵan jarylystan 6 adam qaza tapty
TAShKENT. KAZINFORM — Búgin 13:50 shamasynda Ózbekstannyń Qashqadarııa oblysyna qarasty Qarshy aýdanynda ornalasqan janarmaı quıý beketinde jarylys boldy, dep habarlaıdy Kazinform agenttiginiń Tashkenttegi menshikti tilshisi.
Tótenshe jaǵdaılar mınıstrliginiń málimetinshe, oqıǵa ornyna bes qutqarý bólimshesi jiberilip, órt saǵat 14:55–te tolyq sóndirildi. Jarylys saldarynan 6 adam qaza taýyp, túrli dárejede jaraqat alǵan 5 turǵyn aýrýhanaǵa jetkizildi. Sonymen qatar tórt kólik, otyn saqtaýǵa arnalǵan eki jerasty tsısternasy zaqymdandy.
Jaǵdaıǵa baılanysty Mınıstrler kabınetiniń ókimimen Úkimettik komıssııa quryldy. Onyń basshylyǵyna zardap shekkenderge qajetti kómek kórsetý, jarylystyń saldaryn joıý, oqıǵanyń sebebin anyqtaý jáne bolashaqta osyndaı jaǵdaıdardyń aldyn alý jóninde sharalar ázirleý tapsyryldy.
Eske salaıyq, byltyr Ózbekstanda tótenshe jaǵdaılardan 221 adam qaza tapqan.
Sonymen qatar 2025 jyly Ózbekstanda 9 226 jol-kólik oqıǵasy bolyp, saldarynan 2100-den astam adam kóz jumdy.
