Ózbekstanda jańa mınıstrlik quryldy
TAShKENT. QazAqparat - Ózbekstan prezıdenti Shavkat Mırzıeevtiń qaýlysymen Innovatsııalyq damý jónindegi jańa mınıstrlik quryldy, dep habarlaıdy «QazAqparat» HAA-nyń menshikti tilshisi ÓR prezıdentiniń resmı saıtyna silteme jasap.
Mınıstrliktiń basty mindetteriniń biri ǵylymnyń, joǵary tehnologııalar men qazirgi ınnovatsııalyq ázirlemelerdiń jetistikterin is júzine asyrý bolyp tabylady.
«Bizdiń berekeli elimiz jerasty jáne jerústi baılyqtaryna, adamı resýrstarǵa, biliktiligi joǵary mamandarǵa baı. Degenmen, ókinishke qaraı, osynaý mol múmkindikter tıimdi ári oryndy paıdalanylmaı keledi», - dep atap ótti Shavkat Mırzıeev Ózbekstanda jańa mınıstrliktiń qurylýyna baılanysty.
Eske sala ketsek, aǵymdaǵy jyldyń 27 qarashasynda ÓR prezıdenti «ÓR Mınıstrler kabınetiniń qyzmetin jetildirý jónindegi qosymsha sharalar týraly» qaýlyǵa qol qoıǵan bolatyn. Atalǵan qujatqa sáıkes, eldiń atqarýshy bıligi qaıta quryldy, jańa keshender men mınıstrlikter paıda boldy. ÓR Mınıstrler kabınetine ınvestıtsııalar, ınvestıtsııalyq damý, erkin ekonomıkalyq aımaqtar men shaǵyn ónerkásip aımaqtarynyń qyzmetin úılestirý máseleleri jónindegi keshen basshylary jáne bilim berý, densaýlyq saqtaý, ekologııa jáne dene tárbıesi kesheniniń basshysy laýazymdary engizildi.
