Ózbekstanda zeınet jasy kezeń-kezeńimen kóterilmek
ASTANA. KAZINFORM — Ózbekstanda zeınetkerlik jasty birtindep kóterý usynyldy. Qoldanystaǵy tártip boıynsha er adamdar 60 jasta, al áıelder 55 jasta zeınetke shyqsa, jańa usynys boıynsha bul jas erler úshin 63-ke, áıelder úshin 58 jasqa deıin ulǵaıtylmaq.
Ózbekstannyń Ekonomıka jáne qarjy mınıstrligi qoǵamdyq talqylaýǵa Prezıdent jarlyǵynyń tıisti jobasyn usyndy.
Qujatqa sáıkes, zeınetkerlik jasty 2028 jyldan bastap jyl saıyn úsh aıdan kezeń-kezeńimen kóterý josparlanyp otyr. Nátıjesinde 2039 jylǵa qaraı erlerdiń zeınetke shyǵý jasy 63 jasqa, áıelderdiki 58 jasqa jetedi.
Usynylyp otyrǵan ózgerister halyqtyń ómir súrý uzaqtyǵynyń artýyn eskere otyryp, azamattardyń zeınetaqy júıesine qatysý kezeńi men zeınetaqy alatyn kezeńi arasyndaǵy tepe-teńdikti qamtamasyz etýge baǵyttalǵan.
Zeınetkerlik jasty kóterý kezeńinde zeınet jasyna jaqyndaǵan azamattarǵa birqatar kepildikter berý de qarastyrylǵan. Atap aıtqanda, jumys berýshilerge qyzmetkerdi tek onyń zeınetaldy jasyna jetkenine baılanysty jumystan shyǵarýǵa nemese jumysqa qabyldaýdan bas tartýǵa tyıym salynbaq.
Sondaı-aq jumyssyz dep tanylǵan azamattardyń zeınetke belgilengen merzimnen eki jyl buryn shyǵý quqyǵyn saqtaý usynylyp otyr.
Al jer astyndaǵy, zııandy jáne aýyr eńbek jaǵdaılarynda tolyq jumys kúnimen eńbek etetin azamattar úshin qoldanystaǵy jeńildikter saqtalady.
Qujat boıynsha qoǵamdyq talqylaý 30 qyrkúıekke deıin jalǵasady.
Buǵan deıin Germanııada zeınet jasyn 70 jasqa deıin kóterý usynylǵan edi.
Qazaqstanda zeınetkerler nege eńbek etýdi tańdaıdy myna maqaladan oqyńyz.
