Ózbekstanda zańsyz baılyqqa kenelgenderge jaza engizý usynyldy

TAShKENT. KAZINFORM – Ózbekstan prezıdenti Shavkat Mırzıeev «Memlekettik qyzmetshilerdiń kirisin deklaratsııalaý týraly» zańdy tez arada qabyldaýdy tapsyrdy, dep habarlaıdy Kazinform agenttiginiń menshikti tilshisi.

Sybaılas jemqorlyqqa qarsy ulttyq keńestiń keńeıtilgen otyrysynda sóz sóılegen Ózbekstan basshysy sheneýlikterdiń kirisin deklaratsııalaý zańyn qabyldaýdyń ýaqyty kelgenin aıtty.

Osyǵan baılanysty Shavkat Mırzıeev jaýapty vedomstvolarǵa qysqa merzimde zań jobasyn qoǵamdyq talqylaýǵa shyǵarýdy tapsyrdy. Qujat depýtattardyń qaraýyna 1 sáýirge deıin engizilýi kerek.

— Zańsyz baılyqqa kenelgenderdi jaýapqa tartý máselesin qarastyrý qajet. Osy oraıda, zańnamaǵa tıisti bap engizýdi usynamyn. ıAǵnı, memlekettik qyzmetshi óziniń deklaratsııalanǵan kirisine saı kelmeıtin múliktiń qaıdan alynǵanyn dáleldeýi tıis, — dep atap ótti Ózbekstan prezıdenti.

Toqtala keteıik, memlekettik qyzmetshilerdiń kirisin deklaratsııalaý týraly zańdy qabyldaý 2022 jyldan bastap josparlanyp keledi.

Eske salsaq, atalǵan keńes barysynda Ózbekstan prezıdenti jemqorlyqpen kúreske jaýapty 117 sheneýnikti qyzmetinen bosatýdy tapsyrdy.