Ózbekstanda zańsyz arystan asyraǵandar anyqtaldy
TAShKENT. KAZINFORM – Ózbekstan astanasynda jáne Tashkent oblysynda 80-nen astam jabaıy janýardy zańsyz ustaǵandar anyqtaldy, dep habarlaıdy Kazinform agenttiginiń menshikti tilshisi.
Ózbekstannyń Ekologııa, qorshaǵan ortany qorǵaý jáne klımattyń ózgerýi mınıstrligi jáne Bas prokýratýranyń qyzmetkerleri júrgizgen tekserý kezinde tıisti ruqsatsyz jabaıy janýar asyraǵandardyń áreketi áshkere boldy.
Resmı málimetke sáıkes, olar 4 arystan, qustyń 9 túrin jáne ózge de jyrtqyshtardy ustaǵan. Jabaıy janýarlardyń bir bóligi Tashkenttegi haıýanattar baǵyna berildi.
Eske salaıyq, byltyr Ózbekstanda haıýanattar baǵyndaǵy tordan shyǵyp ketken 3 arystan kúzetshini talap óltirgen edi.
Qosa ketsek, bıyldan bastap Ózbekstandaǵy tsırkterde jabaıy janýarlardy paıdalanýǵa tyıym salyndy.