Ózbekstanda zańsyz aǵash kesý áreketteri tyıylmaı tur

TAShKENT. KAZINFORM – Ózbekstanda engizilgen moratorııge qaramastan, zańsyz aǵash kesý áreketteri tyıylmaı tur, dep habarlaıdy Kazinform agenttiginiń menshikti tilshisi.

Ózbekstan Bas prokýratýrasynyń málimetinshe, jyl basynan beri respýblıkada 848 aǵash zańsyz kesilgen. Tıisinshe, kináli adamdar zańǵa sáıkes jazalandy.

- Máselen, bıyl 13 aqpanda Ferǵana oblysynda turǵyndar on jyldyq úıeńki aǵashyn zaqymdady. Zań buzýshylar bul áreketti toqtatýǵa tyrysqan ekologııa jáne ishki ister organdary qyzmetkerlerin balaǵattaǵan. Atalǵan jaǵdaı áleýmettik jelilerde rezonans týdyrdy, - dep málim etti Bas prokýratýradan.

Toqtala keteıik, 2021 jyly 30 jeltoqsanda Ózbekstan prezıdenti Shavkat Mırzıeevtiń jarlyǵymen aǵash kesýge merzimsiz maratorıı jarııalandy. Oǵan saı, aıyppul somasy 5 ese ulǵaıyp, zalal kólemi 2 ese mólsherde óndirilip alynady. Sondaı-aq, aǵashty otap jatqandar týraly aqparat usynǵan turǵyndarǵa syıaqy beriledi.

Eske salaıyq, buǵan deıin «Ertis ormanynda» 2029 jylǵa deıin aǵash kesýge tyıym salynǵanyn jazyp edik.

Sondaı-aq, byltyr Qazaqstanda júrgizilgen jańa jyldyq reıdter barysynda zańsyz aǵash kesý faktileri anyqtaldy.