Ózbekstanda VIII ǵasyrdaǵy Quran kitabyn qalpyna keltirý jumystary aıaqtaldy

TAShKENT. QazAqparat – Ózbekstanda VIII ǵasyrdyń sońynda jazylǵan kóne Quran kitaby restavratsııadan keıin kópshilik nazaryna usynyldy. Bul týraly Ózbekstannyń Mádenıeti men ónerin damytý qory Keńesiniń tóraǵa orynbasary Saıda Mırzıeeva Telegram-da jazdy, dep habarlaıdy «QazAqparat» HAA tilshisi.

Ǵylymı zertteýlerge sáıkes, Quran kitaby uzaq ýaqyt boıy Ózbekstannyń Qashqadarııa oblysy Qamashın aýdanyndaǵy Langar ota meshitinde saqtalyp kelgen. Ol VIII ǵasyrdyń sońynda jazylǵan jáne ıslam álemindegi eń kóne qoljazbalardyń biri bolyp tabylady.

Mádenıet jáne ónerdi damytý qory men Ózbekstan Musylmandary dinı basqarmasy birlesip uıymdastyrǵan jobaǵa Frantsııanyń belgili Lývr mýzeıiniń mamandary jumyldyryldy.
«Katta Longar Quranynyń paraqtary restavratsııaǵa deıin óte qurǵaq jáne adyr-budyrly boldy. Óte kóp shań-tozań otyrǵan. Biz restavratsııa protsesin árbir paraqty tazartýdan bastadyq. Kitap qatty deformatsııaǵa ushyraǵan», - dedi frantsýz mamany Aksel Delo.

2019 jyly bastalǵan qaıta qalpyna keltirý jumystary úsh kezeńmen júrgizilgen. Aldymen, protsestiń jospary qurylǵan. Qurannyń jaı-kúıi týraly sıpattama jazylyp, fotofıksatsııa jasalǵan. Qoljazbanyń betteri jeke-jeke alynǵan. Restavratsııanyń sońǵy kezeńinde kitap 15 aıǵa baspaq astyna ornalastyrylǵan. Keıin arnaıy qaptamaǵa salyndy.

Saıdy Mırzıeevanyń pikirinshe, kóne kitap endi kóptegen ǵasyr boıy bútin adamzattyń rýhanı baılyǵy bolady.

Ózbekstan Musylmandary dinı basqarmasynyń tóraǵasy Ýsmonhon Alımovtyń aıtýynsha, álemde Kattalangar Quranynyń bir ǵana danasy bar. Kitap 206 betten turǵan bolýy múmkin. Saqtalǵany 97 bet qana. Ózbekstanda kıeli qoljazbanyń 17 beti saqtaýly.