Ózbekstanda ustalǵan Qazaqstannyń eresek azamattary bul eldi eki-úsh kún ishinde tastap kete alady

Bul týraly agenttik tilshisine bergen suhbatynda Qazaqstan respýblıkasynyń Ózbekstandaǵy Elshiliginiń konsýly Babýr Dáýrenbek habarlady.

Juma, 29 shildede QR konsýly Tashkent oblystyq ІІB Ońaltý ortalyǵynda ustalyp otyrǵan tórt eresek azamatpen kezdesti. Qazaqstandyq azamattarǵa barý kezinde ol joǵaryda atalǵan ortalyqtyń basshysy Ikram Tıllaevpen áńgimelesip, ol elshilik ókiline ustalǵan azamattardyń elderine qaıtý máselesi eki-úsh kún ishinde sheshimin tabatynyna sendirdi, osy másele boıynsha joǵary organdardyń tıisti tapsyrmasy da bolyp shyqty.

Konsýldyń aıtýynsha, elimizdiń tórt azamaty - Haırtın Faızýllın, Erbol Orazalın, Mars Sadyqov pen Danııar Faızýllınniń jaǵdaıy jaqsy, dárigerlik kómekti qajet etip otyrǵan joq. Qant dıabetimen aýyratyn M.Sadyqov dárigerlerdiń baqylaýynda, onyń densaýlyǵyna qaýip joq. Atalmysh azamatqa dári-dármekter jetkizildi.

Ustalǵan toptyń basshysy E.Orazalınniń aıtýynsha, Qazaqstan azamattary Ózbekstan aýmaǵyna adasyp kirýi saldarynan tutqyndalǵan.

Atap óter jáıt, qazaqstandyq BAQ tarapynan ózbekstandyq bılik ókilderiniń ustalǵan jetkinshekterdi bosatý úshin aıyppul surap otyrǵan degen aqparaty jalǵan bolyp tabylady, dep atap ótti B.Dáýrenbek.