Ózbekstanda úshinshi jyl qatarynan gaz óndirisi tómendep barady
TAShKENT. KAZINFORM – Bıyl alǵashqy toqsanda Ózbekstanda 9,6 mlrd tekshe metr gaz óndirildi, 2025 jyldyń sáıkes kezeńimen salystyrǵanda bul 1,7 mlrd tekshe metrge az, dep habarlaıdy Kazinform agenttiginiń Tashkenttegi menshikti tilshisi.
Ulttyq statıstıka komıtetiniń málimetinshe, byltyr qańtar-naýryz aralyǵynda - 11,3 mlrd, al 2024 jyly 11,6 mlrd tekshe metr gaz óndirilgen. Osylaısha, kórsetkish úshinshi jyl qatarynan tómendep barady.
Sonymen qatar 2024 jyldyń birinshi toqsanynda elde 179,1 myń tonna mundaı óndirilse, bıyl ol 157,3 myń tonnaǵa deıin azaıdy. Bul rette Ózbekstanda janar-jaǵarmaı óndirisi 304,3 myń tonnadan 313,2 myń tonnaǵa deıin ósti, al dızel 182 myń tonnadan 280,9 myń tonnaǵa deıin ulǵaıdy.
Óndiristiń quldyraýyna baılanysty kórshiles memleket qańtar-naýryz aralyǵynda gaz ımportyn 2,2 ese arttyryp, Reseı men Túrikmenstannan 360,5 mln dollarǵa kógildir otyn satyp aldy. Al atalǵan resýrstyń Qytaıǵa eskporty 36,7 mln dollarǵa deıin qysqardy.
Qosa ketsek, bıyl úsh aıda Qazaqstan men Ózbekstan arasyndaǵy taýar aınalymy 1,3 mlrd dollarǵa jetti.
Eske salaıyq, taıaýda Azııa damý banki Basqarýshylar keńesiniń otyrysynda prezıdent Shavkat Mırzıeev jahandyq qaqtyǵystar OA elderi úshin júk tasymaly qunynyń 30%-ǵa deıin ósýine sebep bolyp jatqanyn aıtty.
