Ózbekstanda úsh jylda 48 jańa ýnıversıtet ashyldy
NUR-SULTAN. QazAqparat – Ózbekstanda úsh jylda 48 jańa ýnıversıtet ashyldy. Bul týraly «Óńirlik deńgeıdegi jahandyq Qazaqstan Bolon protsesinde jáne Eýroodaq jobalarynda» Halyqaralyq onlaın forýmynda Ózbekstan Respýblıkasynyń joǵary jáne orta arnaýly bilim vıtse-mınıstri Ýzokboı Begımgýlov aıtty, dep habarlaıdy QazAqparat tilshisi.
«Bizdiń elimizde joǵary bilim berý salasynda aýqymdy reformalar júrip jatyr. Sońǵy úsh jylda jastardyń joǵary oqý oryndaryna túsýin arttyrý maqsatynda 48 jańa ýnıversıtet quryldy, onyń 16-sy sheteldik ýnıversıtetterdiń fılıaldary. Mysaly: Vebster Ýnıversıteti – AQSh-taǵy, Ajý ýnıversıteti – Koreıa Respýblıkasyndaǵy; Máskeý memlekettik halyqaralyq qatynastar ınstıtýty – Reseı Federatsııasyndaǵy; Amity University – Úndistandaǵy ýnıversıtettiń fılıaly. Bizdiń ýnıversıtetter álemniń 20-dan astam elindegi ýnıversıtettermen qos dıplom berý arqyly 140-tan astam birlesken bilim berý baǵdarlamalaryn júzege asyrýda. Birneshe jyldan beri Ózbekstannyń joǵary oqý oryndary Eýropalyq Odaqtyń túrli bilim berý jobalaryna belsendi qatysyp keledi», – deıdi Ózbekstan Respýblıkasynyń joǵary jáne orta arnaýly bilim vıtse-mınıstri Ýzokboı Begımgýlov.
Onyń aıtýynsha, Ózbekstan men Eýroodaq elderi arasynda júrgizilgen jumystardyń nátıjesinde bilim berýdiń ártúrli salalarynda uzaq merzimdi ýnıversıtetaralyq yntymaqtastyq ornatyldy. Erazmýs + baǵdarlamasy aıasyndaǵy jobalar ózekti máselelerdi sheshýge kómektesedi, atap aıtqanda: joǵary bilimniń ınternatsıonaldanýy, joǵary bilim sapasyn arttyrý, kredıttik-modýldik oqytý júıesin engizýdi qosa alǵanda, birlesken bilim berý baǵdarlamalaryn, oqý quraldary men standarttardy ázirleý, respýblıkanyń joǵary oqý oryndarynda sheteldik oqytýshylardyń dáristerin uıymdastyrý, oqytýshylar quramynyń biliktiligin arttyrý.
Sonymen qatar, ol Erazmýs + jobalaryn iske asyrý bilim berý úderisin ǵylymmen jáne óndirispen úılestirýge yqpal etetindigin aıtty.
