Ózbekstanda týystardyń bir-birine úılenýine zań júzinde tyıym salynady

TAShKENT. QazAqparat - Ózbekstanda týystyq nekege zańmen tyıym salý usynyldy, dep habarlaıdy QazAqparattyń menshikti tilshisi normatıvtik qujat jobalaryn talqylaýǵa arnalǵan regulation.gov.uz portalyna silteme jasap.

Ózbekstannyń otbasy kodeksine ózgeris engizý týraly zań jobasy týystardyń nekege turýyna tyıym salýdy kózdeıdi.

«Qoǵam damýynyń zamanaýı erekshelikteri otbasyn nyǵaıtýǵa, balalardyń quqyqtary men zańdy múddelerin qorǵaýǵa, jaqyn týystarynyń nekege turýyna jol bermeýge baǵyttalǵan zańnamany jetildirýdi talap etedi», - delingen zań jobasynda.

Endi kodekste týystar arasyndaǵy, týysqan aǵa-ini men apaly-sińliler arasyndaǵy, sondaı-aq asyrap alýshylar men asyrap alynǵandar arasynda nekege turýǵa tyıym salynady.

Zań jobasyna túsindirme jazbada AHAJ organdarynyń statıstıkalyq derekteri keltiriledi, oǵan sáıkes respýblıkada ótken jyldyń ekinshi jartysynda 1 201 týystyq neke tirkelgen.

Mundaı nekede týabitken aýytqýy, deformatsııalary jáne hromosomalyq aqaýy bar balalar aýrýynyń ósimi baıqalady.

Buǵan deıin Ózbekstanda balalardaǵy sırek kezdesetin genetıkalyq aýrýlardyń tórtten bir bóligi týystyq nekege baılanysty dep habarlanǵan.