Ózbekstanda Túrki memleketteri uıymy Bas prokýrorlary keńesiniń kezekti otyrysy ótti
TAShKENT. KAZINFORM — Qazaqstan Respýblıkasynyń Bas prokýrory Berik Asylov Tashkent qalasynda ótken Túrki memleketteri uıymy Bas prokýrorlary keńesiniń 4-otyrysyna qatysty. Bul týraly Bas prokýratýra málim etti.
Jıynǵa Ázerbaıjan, Qyrǵyzstan, Túrkııa jáne Ózbekstan joǵarǵy qadaǵalaý organdarynyń basshylary, sondaı-aq Túrikmenstannan baqylaýshylar qatysty.
— Kezdesýde prokýratýra organdarynyń qyzmetine jańa aqparattyq-kommýnıkatsııalyq tehnologııalardy engizý, tsıfrlyq krımınalıstıkany damytý, halyqaralyq yntymaqtastyqty kúsheıtý jáne jahandyq syn-qaterler jaǵdaıynda birlesken jumystyń tıimdiligin arttyrý máseleleri qaraldy, — delingen habarlamada.
Qazaqstannyń Bas prokýrory óz sózinde tsıfrlyq transformatsııa eldiń strategııalyq basymdyǵy bolǵanyn atap ótti.
Ol Qazaqstan Prezıdenti aıqyndaǵan kýrs jasandy ıntellektti engizý jáne turaqty tsıfrlyq orta qalyptastyrýǵa baǵyttalǵanyn atap ótti.
B.Asylov vırtýaldy ortadaǵy qylmystylyqpen kúreske erekshe kóńil bóldi. Qazaqstandyq qadaǵalaý organynyń basshysy atap ótkendeı, kıberqylmystyń kólemi men qaýiptiligi synı deńgeıge jetti jáne ony toqtatý úshin tıimdi tásilderdi birge ázirleý qajet.
Sonymen qatar, is-shara aıasynda Qazaqstan men Ózbekstan Bas prokýrorlarynyń ekijaqty kezdesýi ótip, onda transulttyq qylmyspen kúresti keńeıtý máseleleri talqylanyp, aımaqtyq qaýipsizdikti qamtamasyz etýge baǵyttalǵan birlesken sharalar kelisildi jáne 2026–2027 jyldarǵa arnalǵan vedomstvoaralyq yntymaqtastyq baǵdarlamasyna qol qoıyldy.
Jalpy otyrystyń qorytyndysy boıynsha zań ústemdigin nyǵaıtýǵa, qadaǵalaý qyzmetin jetildirýge jáne turaqtylyq pen qaýipsizdikti qamtamasyz etýge baǵyttalǵan ortaq bastamalardy qoldaý bekitilgen Túrki memleketteri uıymy Bas prokýrorlary keńesiniń Deklaratsııasy qabyldandy.
Aıta keteıik, buǵan deıin Bishkekte Túrki memleketteri uıymyna múshe elder dinı kóshbasshylarynyń kezdesýi ótken bolatyn.