Ózbekstanda turǵyn úı, kólik, alkogol jáne temeki ónimderin qolma-qol aqshaǵa satyp alýǵa tyıym salyndy
ASTANA. KAZINFORM — 1 sáýirden bastap Ózbekstan birqatar taýar men qyzmetter, sonyń ishinde jyljymaıtyn múlik pen kólik mámileleri, sondaı-aq alkogol men temeki ónimderin satyp alýǵa qolma-qol aqshasyz tólemderdi mindettedi, dep habarlaıdy Kazinform.
El prezıdentiniń jarlyǵyn iske asyrý aıasynda jańa talaptarǵa shamamen 28 myń taýar, ıaǵnı aınalymdaǵy taýarlardyń jalpy kóleminiń shamamen 7%-y jatqyzylady.
Erejeler memlekettik jáne kommýnaldyq qyzmetter tólemderine, alkogol men temeki ónimderin satyp alýǵa, jyljymaıtyn múlik pen kólik quraldarymen jasalǵan mámilelerge, sondaı-aq 25 mln sýmnan (shamamen 1 mln teńge) asatyn taýarlar men qyzmetterdi satyp alýǵa qatysty qoldanylady.
Jańa erejeler engizýdiń negizgi maqsaty — eldegi baqylanbaıtyn ekonomıkany 1,3 ese qysqartý. Saýda men qyzmet kórsetýdiń osy salada halyqtyń qolma-qol aqshasyz tólemderiniń úlesin keminde 75%-ǵa deıin jetkizý josparlanǵan.
1 sáýirden bastap dúken kassalarynda kelesi taýarlarǵa qolma-qol aqshamen tólem jasaý tehnıkalyq turǵydan shekteledi:
* Alkogol jáne temeki: shamamen 22 myń taýar;
* Janarmaı quıý beketteri: munaı-gaz ónimderin satý jáne elektromobılderdi zarıadtaý;
* Qymbat satyp alýlar: baǵasy 25 mln sýmnan asatyn taýarlar men qyzmetter;
* Kólik jáne turǵyn úı: 561 jyljymaıtyn múlik jáne kólik túri (10 jyldan aspaıtyn ýaqyt buryn shyǵarylǵan ne salynǵan);
* Memlekettik qyzmetter: memlekettik qyzmet kórsetýdiń 56 túri.
Osyǵan deıin Qazaqstan men Ózbekstan arasyndaǵy taýar aınalymy eki aıda 830 mln dollardan asqanyn jazdyq.
