Ózbekstanda turatyn qandasymyz kúresten bes dúrkin Azııa chempıony atandy

NUR-SULTAN. QazAqparat - Delıde (Úndistan) kúres túrlerinen ótip jatqan Azııa chempıonatynda Ózbekstanda turatyn etnıkalyq qazaq balýany Elmurat Tasmuratov besinshi márte Azııa chempıony atandy, dep habarlaıdy QazAqparat tilshisi.

Olamsport.com habarlaýynsha, atalǵan «Saryqurlyq» dodasynda grek-rım kúresinen 63 keli salmaqta synǵa túsken qandasymyz fınalda Ońtústik Koreıa ókili Djınseı Songty 9: 0 esebimen jeńip, Azııa chempıony atandy. Ol osyǵan deıin tórt ret Azııa birinshiligin baǵyndyrǵan bolatyn. Mine, Delıde taǵy da qarsylas shaq keltirmeı, besinshi márte Azııa chempıony atandy.

Ol Ózbekstannyń Bostandyq aýdany Qyzyl Tý aýylynda dúnıege kelgen. 1991 jyly týǵan Elmurat 13 jasynda elge oralyp, Bekzat Sattarhanov atyndaǵy mektep-ınternatta bilim alady. Kúreske ıkemi bolǵanymen, qurama bapkerleri túrli syltaýlarmen ony shaqyrmaıdy. Ulttyq quramanyń sapyna iline almaǵan Elmurat keıin Ózbekstanǵa qaıta kóship ketken.

Aıta keteıik, Delıde ótip jatqan Azııa birinshiliginde grek-rım kúresinen Qazaqstan balýandary ázirge 4 medal jeńip aldy. Onyń bireýi - altyn, úsheýi - qola medal.