Ózbekstanda turatyn qandastarymyzdyń Qazaqstanǵa oralýyna qoldan kedergi jasalýda - Ýálıhan Qalıjan
TANA. 7 qyrkúıek. QazAqparat /Rýslan Ǵabbasov/ - Búgin Parlament Májilisiniń jalpy otyrysynda Májilis depýtaty Ýálıhan Qalıjan QR Syrtqy ister mınıstri Erjan Qazyhanovqa Ózbekstanda turatyn
qandastarymyzdyń Qazaqstanǵa oralýyndaǵy qatań tártipterdi sheshýge baılanysty depýtattyq saýal joldady.
«Tarıh pen taǵdyr taýqymetine oraı 5 mıllıondaı etnıkalyq otandastarymyzdyń álemge tarydaı shashyrap ketkeni barshamyzǵa málim. Elbasy N. Nazarbaev kóshi-qon saıasatyn ulttyq saıasattyń ózekti salasy retinde qarastyrýyna sáıkes, qazirgi kezde 1 mln. adamǵa jýyq baýyrlarymyz tarıhı otanyna kelip úlgerdi»,-dedi halyq qalaýlysy.
Degenmen de sońǵy ýaqytta Ózbekstanda turatyn qandastarymyzdyń Qazaqstanǵa oralýyna qoldan kedergi jasalýda. «Týystas memlekettiń sheneýnikteri etnıkalyq otandastarymyzdyń Ózbekstan azamattyǵynan shyǵý tártibin burynǵydan da qatańdata túskeni málim bolyp otyr»,-dedi Ý. Qalıjan.
Depýtattyń aıtýynsha, budan 7 jyl buryn dál osyndaı qatań talaptar bolǵan kórinedi. «Ol Qasym-Jomart Toqaev myrzanyń aralasýymen sheshilip, Qazaqstan azamattyǵyn alýdyń jeńildetilgen tártibi engizilgen bolatyn. Qalyptasqan jaǵdaıǵa oraı bul máseleni dıplomatııalyq jolmen rettep, sheshýdi suraımyn»,-dedi depýtat E. Qazyhanovqa baǵyttaǵan saýalynda.
