Ózbekstanda týystar arasyndaǵy nekege tyıym salý usynyldy

TAShKENT. KAZINFORM – Ózbekstanda jaqyn týystarmen nekelesýge tyıym salý usynylady. Otbasy jáne áıelder isteri komıteti «Otbasy kodeksine» osyndaı ózgeris engizýdi josparlap otyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar. 

Qoǵamdyq talqylaýǵa shyǵarǵan qujatta jazylǵandaı, Ózbekstanda ekinshi, úshinshi jáne tórtinshi dárejeli týystyq qatynasy bar adamdar arasynda nekege tyıym salý qarastyrylyp otyr. 

2023 jyly týa bitken dert pen genetıkalyq aýrýy bar balalardyń 9,7%-y jaqyn týystardyń nekesinen týǵan. 

«Taldaýǵa sáıkes, 2023 jyly týa bitken derti men genetıkalyq aýrýy bar balalardyń 9,7%-y jaqyn týystardyń nekesinen týǵan. 2021 jyly bul kórsetkish – 9,1%, 2022 jyly 8,3% bolǵan edi. Bul rette eń joǵary kórsetkishter Surhandarııa (31,6%), Qashqadarııada (26%), Syrdarııa (13%), Andıjan (12%), Samarqan (10,3%) jáne Buhara oblystarynda (10,1%) baıqalyp otyr», - delingen qujatta.

Degenmen medıtsınalyq genetıkalyq test nátıjesi boıynsha neke qurýǵa nıetti juptar men olardyń bolashaq perzentteriniń densaýlyǵynda yqtımal dertterdiń bolmaıtyny týraly dáleldeme alynsa, onda nekege ruqsat etiledi. Bul oraıda zań jobasyn ázirlegen kometet Ońtústik Koreıa, Reseı, Shveıtsarııa, Ulybrıtanııa, Ýkraına, AQSh jáne kórshiles elderdiń tájirıbesin negizge alǵan.

Ákesi men anasynyń baýyrlary, olardyń balalary, atasy men ájesiniń baýyrlary, olardyń balalary jáne taǵy da basqalary ekinshi, úshinshi jáne tórtinshi dárejeli týys bolyp sanalady.

Aıta keteıik, qazir Ózbekstanda ata-anasy bir jáne bólek baýyrlar men apaly-sińliler arasyndaǵy nekege ruqsat etilmeıdi.