Ózbekstanda tórt jylda 200-ge jýyq adam dáriden ýlanyp, kóz jumdy

TAShKENT. KAZINFORM — Ózbekstan parlamentiniń Zań shyǵarý palatasy elde dári-dármektiń zańsyz aınalymyn shektep, baqylaýdy kúsheıtýge baǵyttalǵan zań jobasyn qabyldady, dep habarlaıdy Kazinform agenttiginiń menshikti tilshisi. 

Zań jobasyn talqylaý barysynda depýtat Tohır Polvonov 2021-2024 jyldar aralyǵynda Ózbekstanda dári-dármekten 18 myńnan astam adam ýlanyp, onyń 177-si qaıtys bolǵanyn aıtty.

Tıisinshe, máseleniń sheshimi retinde jazany qatańdatý usynylyp otyr. Endi quramynda adam aǵzasyna kúshti áser etetin qospalary bar dárilerdi zańsyz satqandar eki ese kóp aıyppul tólemek. Al preparattardy retseptsiz ótkizetin dárihanalarǵa salynatyn aıyppul 10 ese ósýi múmkin.

Sonymen qatar, qaıtalanyp jasalǵan zańǵa qaıshy áreketter úshin kináliler qylmystyq jaýapqa tartylady. Atap aıtqanda, olar 5 jylǵa deıin bas bostandyǵynan aıyrylýy yqtımal.

Zań jobasy Senatqa joldandy. Endi ony parlamenttiń joǵary palatasy maquldaıdy, keıin qujat qol qoıý úshin prezıdentiń qaraýyna engiziledi.

Qosa keteıik, jyl basynan beri 5 myńnan astam qazaqstandyq Ózbekstanda em alǵan. Sondaı-aq, Qazaqstan men Ózbekstan densaýlyq saqtaý salasyndaǵy yntymaqtastyqty tereńdete túsýge múddeli.