Ózbekstanda tólqujatsyz 500 dollarǵa deıin satyp alýǵa ruqsat etiledi
ASTANA. KAZINFORM – Ózbekstanda tólqujatsyz shetel valıýtasyn qolma-qol aqshamen satyp alýǵa qoıylatyn shekti 100 dollardan 500 dollarǵa deıin arttyrady. Jańa erejeler 9 tamyzdan bastap kúshine enedi, dep habarlaıdy gazeta.uz.
Gazeta.uz jazýynsha, Ózbekstan jeke basyn kýálandyratyn qujatsyz shetel valıýtasyn qolma-qol aqshamen satyp alýǵa qoıylatyn shekti bes ese arttyrady. Ortalyq bank ázirlegen qujat 8 mamyrda memlekettik tirkeýden ótti jáne 9 tamyzda kúshine enedi.
Jańa erejeler azamattarǵa bankterde tólqujat, ІD-karta nemese jeke basyn kýálandyratyn basqa da qujattardy kórsetpeı-aq 500 AQSh dollarǵa deıin shetel valıýtasyn satyp alýǵa múmkindik beredi.
Atap ótilgendeı, qazirgi ýaqytta bankter 100 AQSh dollarynan asatyn shetel valıýtasyn satyp alatyn klıentterge qatysty tıisti tekserýlerdi derbes júrgizýge mindetti.
Klıentti tıisti tekserý sharalaryna onyń jeke basyn anyqtaý jáne tekserý, sondaı-aq onyń atynan áreket etetin tulǵanyń jeke basyn jáne ókilettigin tekserý kiredi. Bankter benefıtsıarlyq menshik ıesin anyqtaýǵa, iskerlik qarym-qatynastyń nemese tranzaktsııanyń maqsaty men sıpatyn tekserýge jáne klıent tranzaktsııalarynyń olardyń profıline sáıkestigin, sonyń ishinde qajet bolǵan jaǵdaıda qarajat kózin únemi baqylaýǵa mindetti.
Gazeta.uz 2025 jyly Ózbekstan azamattary valıýtany satyp alǵannan góri kóbirek satqanyn eske saldy. Aıyrmashylyq 9,7 mlrd dollarǵa deıin ósip (+44,2%), naryqta valıýtanyń qosymsha kózi boldy.
