Ózbekstanda tek týrızmdi oqytatyn ýnıversıtet quryldy
ASTANA. QazAqparat - Ózbekstan Prezıdentiniń 2018 jyldyń 28 maýsymyndaǵy qaýlysymen qurylǵan «Jibek jol» halyqaralyq týrızm ýnıversıteti 2018/2019 oqý jylynan bastap stýdentterdi oqyta bastaıdy. Bul týraly «ÓzA» agenttigi habarlady.
Osy qaýlyǵa sáıkes, týrızm, týrızm dızaıny, týrızm salasyndaǵy marketıng, týrıstik qyzmetter tehnologııasy jáne ony uıymdastyrý, týrızmdegi logıstıka, kásiptik bilim berý, qonaq úı bıznesi, meıramhana bıznesi, menedjment baǵyttary boıynsha ýnıversıtetke 125 túlek qabyldanady.
Budan basqa, Ózbekstan Respýblıkasynyń Týrızmdi damytý jónindegi memlekettik komıtetiniń Samarqand oblystyq aýmaqtyq basqarmasynyń ókilderi osy protseske kómek kórsetedi. 23 shildege deıin 1177 abıtýrıent qujattar tapsyrǵan. Qujattardy qabyldaý 25 shildede aıaqtalady.
Ýnıversıtettiń qyzmetin uıymdastyrý boıynsha jumysty úılestirýdi eskere otyryp, 2018/2019 oqý jylynyń oqý protsessi 2018 jyldyń 1 qazanynda bastalady.
