Ózbekstanda táýlik boıy jumys isteıtin týrıstik ortalyqtar qurylady
TAShKENT. KAZINFORM – Ózbekstanda týrıstik salany damytý aıasynda «Ár maýsymdaǵy saıahat», «Ózbekstanda taǵy bir kún» jáne basqa da jobalar iske asyrylmaq.
Ózbekstan basshysynyń baspasóz qyzmetinen málim etkendeı, Shavkat Mırzıeev týrısterdi tartý baǵytynda qolǵa alynyp jatqan jobalarmen tanysty.
Máselen, saıahattap kelgender úshin eń tartymdy sanalatyn 12 aýdan men qalada týrıstik ortalyqtar qurý josparlanyp otyr. Ondaǵy meıramhana, kafe, saýyqtyrý oryndary men basseınder táýlik boıy úzdiksiz jumys istemek.
Kýrorttyq aımaqtar men oıyn-saýyq keshenderinde halyqaralyq brendter, jibek matalar, kádesyılar, zergerlik buıymdar men altyn quımalar dúkeni ashylady. Ol úshin 2027 jyldyń 1 qańtaryna deıin týrıstik ortalyqtardaǵy kásipkerler úshin jer men múlikke salynatyn salyq mólsherlemesi 90%-ǵa tómendeıdi, al 2026 jyldyń 1 naýryzyna deıin olar zergerlik jáne altyn buıymdardy óndirýge qajetti jabdyqtar men tehnologııalarǵa kedendik baj salyǵynan bosatylady.
Bıyldan bastap «Ózbekstanda taǵy bir kún» baǵdarlamasy iske asyrylady. Ol oblystardyń týrıstik obektileri jáne aýdan men qalalar arasyndaǵy óńirlik saıahat baǵyttaryn baılanystyratyn respýblıkalyq týrıstik marshýrýttardy qurýdy kózdeıdi.
Sonymen qatar, «Ár maýsymdaǵy saıahat» baǵdarlamasyn qolǵa alý qarastyrylǵan. Onyń sheńberinde kóktem jáne kúzde ekologııalyq, ekstremaldy, medıtsınalyq jáne saýyqtyrý týrızmin, jazda sý jáne kýrorttyq, qys mezgilinde shańǵy týrızmin ilgeriletý jónindegi sharalar iske asady. Týrıstik maýsymdardyń ashylýyna oraı festıvaldar ótedi.
Ózbekstannyń týrıstik áleýetin shetelde ilgeriletý maqsatynda «Týrızm elshileri» ınstıtýty engiziledi. Eki jylda bir ret mamyr aıynda 2 mln dollar júlde qorymen «Ózbekstannyń jibek matalary» halyqaralyq sán aptalyǵy ótedi.
Ózbekstan basshysy Shavkat Mırzıeev atalǵan usynystardy maquldap, ekotýrızmdi odan ári damytý, múgedek adamdardyń saıahattaýy úshin qajetti jaǵdaı jasaý boıynsha birqatar tapsyrma berdi.
Eske sala keteıik, byltyr Ózbekstanda týrıstik aǵynnyń ortasha jyldyq ósimi 20%-dan asty. 2023 jyly qańtar-qarasha aılary aralyǵynda elge 6 mln 134 myń sheteldik týrıst kelgen.
