Ózbekstanda táýligine 300 myńnan asa adamǵa vaktsına salynady

TAShKENT. QazAqparat – Tamyzdyń basynan bastap Ózbekstanda koronavırýsqa qarsy vaktsınalaý qarqyny edáýir ósti, dep habarlaıdy QazAqparattyń menshikti tilshisi.

Ózbekstan Respýblıkasy Densaýlyq saqtaý mınıstrliginiń dereginshe, tamyzdyń basynan beri kúndelikti vaktsınalaý sany 300 myńnan asyp otyr. Táýliktik kórsetkish rekordy 2 tamyz kúni tirkeldi, ol kúni koronavırýsqa qarsy vaktsınany 327 628 adam aldy.

Búgingi kúni vaktsınanyń 8 318 126 dozasy paıdalanylǵan, olardyń ishinde 5 453 534 adam ekpeniń birinshi dozasyn alsa, vaktsınanyń ekinshi jáne úshinshi komponentin (ZF-UZ-VAC2001 qytaı-ózbek vaktsınasy úsh dozamen salynady) alǵandar sany – 2 055 938 jáne 808 654.

Óńirlerdiń arasynda vaktsınalaý qarqyny boıynsha Ferǵana (1 045 608), Namangan (1 040 493) jáne Ándijan (922 565) oblystary kósh bastap tur.

Eske sala keteıik, Ózbekstanda vaktsınalaý kampanııasy 1 sáýirden bastaldy.

Vaktsınalaýda tórt preparat qoldanylady: eýropalyq AstraZeneca vaktsınasy, qytaı-ózbek ZF-UZ-VAC2001 vaktsınasy, reseılik «Spýtnık-V» jáne 1 tamyzdan bastap amerıkalyq Moderna vaktsınasy.

Respýblıkadaǵy epıdemıologııalyq ahýaldyń nasharlaýyna baılanysty koronavırýspen kúres jónindegi arnaıy komıssııa 17 shilde kúni 18 jastan asqan saýda, qoǵamdyq tamaqtandyrý, qyzmet kórsetý jáne bilim salalarynda jumys isteıtin azamattardy, sonymen qatar áskerıler men quqyq qorǵaý organdarynyń qyzmetkerlerin mindetti vaktsınalaý týraly sheshim qabyldady.

3 tamyzdan bastap Ózbekstanda halyqtyń jumys isteıtin bóligin mindetti vaktsınalaýdy quqyqtyq negizde bekitetin zań qabyldandy.