Ózbekstanda Tashkent halyqaralyq ınvestıtsııalyq forýmy ótedi
TAShKENT. KAZINFORM — 16-18 maýsym kúnderi Ózbekstan astanasynda V Tashkent halyqaralyq ınvestıtsııalyq forýmy ótedi, dep habarlaıdy Kazinform agenttiginiń Tashkenttegi menshikti tilshisi.
Aýqymdy is-sharaǵa 99 elden keletin 8 myńnan astam delegat qatysady. Shaqyrylǵandardyń qatarynda shet memleketterdiń úkimet basshylary men ókilderi, bedeldi halyqaralyq qarjy ınstıtýttarynyń, iri kompanııalardyń, ınvestıtsııalyq qorlardyń jetekshileri bar.
Resmı málimetke saı, forýmǵa qatysatyn qazaqstandyq delegatsııany Premer-mınıstr Oljas Bektenov bastap keledi. Іs-shara barysynda Úkimet basshysy sóz sóıledi.
Forým aıasynda Ózbekstan prezıdenti janyndaǵy Sheteldik ınvestorlar keńesiniń kezekti plenarlyq otyrysy ótedi. Onda kórshiles eldegi ınvestıtsııalyq ahýaldy odan ári jaqsartý, ónerkásiptik-tehnologııalyq jáne ınnovatsııalyq damýdy jedeldetý máseleleri qaralady.
Ózbekstan basshysynyń baspasóz qyzmetinen málim etkendeı, bıylǵy forýmda iri ınvestıtsııalyq kelisimder jasaý josparlanǵan. Qazirgi ýaqytta jańa jobalardy ázirleý jumysy belsendi júrip jatyr.
Eske salaıyq, ózbek tarapy bıyl eldiń ekonomıkalyq ósimi 8 paıyzdan joǵary bolatynyn boljap otyr.
Qosa ketsek, bıyl úsh aıda qazaqstandyq kásipkerler Ózbekstanda 40-qa jýyq kompanııa qurǵan.
