Ózbekstanda tamaqtan ýlanǵan balalardyń sany 2 myńǵa jýyqtady

ASTANA. KAZINFORM — Sanıtarlyq-epıdemıologııalyq salaýattylyq jáne densaýlyq saqtaý komıtetiniń UzNews.uz saıtyna habarlaýynsha, qazirdiń ózinde 1900-den astam bala aýrýhanaǵa jatqyzylǵan. 

930-dan astam balada aýrý belgileri baıqalmaı, úılerine shyǵaryldy. 941 balanyń jaǵdaıy jeńil dep baǵalansa, 22 balanyń jaǵdaıy ortasha aýyr.

Piskent, Bóke, Bekabad, Aqqorǵan, tómengi Shyrshyq aýdandarynan keıbir naýqastar jergilikti aýrýhanalarda tósek-oryn tapshylyǵyna baılanysty Almalyq jáne Nurafshon qalalaryna aýystyrylǵany aıtyldy.

Bul aýdandarǵa úsh aýtsorser qyzmet kórsetetini, úsheýi de aırandy Aqqorǵandaǵy Shark Milk Product kompanııasynan satyp alǵany anyqtaldy. Bul kásiporyn Úshtepa aýdanynda tirkelgenimen, óndiris Aqqorǵan aýdanynda júrgizilgen. Ónimniń úlgileri, onyń ishinde 540 synama zerthanalyq taldaý úshin alyndy.

Jappaı ýlaný týraly alǵashqy aqparat qyrkúıektiń 25-i kúni tańerteń Piskent jáne Bóke aýdandaryndaǵy balabaqshalardyń ondaǵan búldirshini aýrýhanaǵa jetkizilgen kezde paıda boldy. Bir kúnniń ishinde aýrýhanaǵa jatqyzylǵan balalardyń jalpy sany 109-ǵa jetkeni, olardyń kópshiligi Aqqorǵan aýdanyndaǵy balabaqshalardan ekeni habarlandy.

26 qyrkúıekte medıtsınalyq kómekke júgingen balalardyń sany 1940-qa jetken. Ýlaný jaǵdaılary jeti aýdan men qalada: Aqqorǵan (413), Bóke (537), Piskent (430), tómengi Shyrshyq (64), Bekabad (98) aýdandarynda, sondaı-aq Almalyq (285) jáne Nurafshon (113) qalalarynda tirkeldi.

Eske sala keteıik, Ózbekstanda 109 bala tamaqtan ýlanyp qaldy.