Ózbekstanda taǵy bir dáriniń satylýyna tyıym salyndy
Dárilik zattardyń sapasyn baqylaý jáne standarttaý zerthanasy júrgizgen «Dok-1 Maks» jáne «Ambronol» preparattarynyń sapasyn tereńdetilgen baqylaý nátıjeleri boıynsha atalǵan dári-dármektiń normatıvtik quqyqtyq qujatta kórsetilgen quramǵa sáıkes kelmeıtini anyqtaldy.
Atap aıtqanda, olardyń keıbir serııalarynda propılenglıkoldiń ornyna nemese onymen birge etılenglıkol jáne dıetılenglıkol qospasy bolatyny anyqtaldy. Osyny eskere otyryp, turǵyndardyń densaýlyǵyn saqtaý jáne qalǵan dári-dármekterge qosymsha tekserý júrgizý maqsatynda saqtyq sharasy retinde 2022 jyly «Quramax Medical» JShS respýblıka aýmaǵyna ákelingen barlyq dári-dármekterdi satý toqtatyldy.
Buǵan deıin habarlaǵanymyzdaı, 22 jeltoqsan kúni Ózbekstanda balalardyń ólimine sebep bolýy múmkin degen negizben tumaý men sýyq tııýge qarsy úndilik «Dok-1 Maks» preparatyn satýǵa ýaqytsha tyıym salyndy.
27 jeltoqsanda ÓR Densaýlyq saqtaý mınıstrligi 18 balanyń ólimi «Dok-1 Maks» preparatynan bolǵanyn rastady. Memlekettik saraptama jáne standarttaý ortalyǵy preparat talapqa saı kelmeıdi degen qorytyndy shyǵardy.
Ózbekstannyń Memlekettik qaýipsizdik qyzmeti (MQQ) 18 balanyń tumaýǵa qarsy úndi dárisinen keıin kóz jumý oqıǵasyna qatysty qylmystyq is qozǵady.
29 jeltoqsanda «Dok-1 Maks» preparatyn ishken taǵy bir bala qaıtys bolǵany belgili boldy.
