Ózbekstanda taǵy bir gaz quıý beketinde jarylys boldy

ASTANA. KAZINFORM — Bul — sońǵy 20 kúndegi ekinshi jaǵdaı. Órt saldarynan avtotsısterna júrgizýshisi kúıip qaldy, dep habarlaıdy ÓR TJM. 

5 tamyz kúni Qashqadarııa oblysynyń Kókdala aýdanyndaǵy gaz quıý beketinde órt pen jarylys boldy.

TJM málimetinshe, avtokólikterge gaz quıý beketi «Altyndala» yqsham aýdanynda ornalasqan.

Onyń aýmaǵynda suıytylǵan propan gazyn tasymaldaıtyn júk kóliginen propan saqtaıtyn tsısternaǵa janarmaı quıý kezinde órt shyqqan.

Oqıǵa ornyna saǵat 22:22-de 5 órt sóndirý jáne avarııalyq-qutqarý jumystary brıgadasy jetip, órt 22:30-da aýyzdyqtalyp, 22:50-de sóndirildi.

Órt saldarynan 1 avtotsısterna men 10 tekshe metr propan suıytylǵan gaz saqtaıtyn tsısterna janyp ketken. Avtotsısterna júrgizýshisi jeńil kúıik aldy.

Oqıǵa ornyna oblystyq TJB men aýdandyq TJB basshylary bardy.

Eske sala keteıik, 16 shildede Kókdala aýdanynda gaz quıý beketindegi janarmaı saqtaıtyn tsısternada jarylys boldy. Apat saldarynan 4 azamat qaza tapqan edi.

Sondaı-aq Qaraqalpaqstandaǵy «Moınaq» ken ornyn burǵylaý kezinde gaz atqylaǵany jaıly jazǵan edik.