Ózbekstanda «Spýtnık V» vaktsınasynyń óndirisi iske qosyldy

TAShKENT. ÓzA – QazAqparat – Reseıdiń N.Gamaleı atyndaǵy epıdemıologııa jáne mıkrobıologııa ǵylymı-zertteý ortalyǵy jasaǵan «Spýtnık V» vaktsınasynyń Ózbekstandaǵy óndirisi iske qosyldy. Bul týraly QazAqparat ÓzA silteme jasap habarlaıdy.

Ózbekstan Densaýlyq saqtaý mınıstrliginiń habarlaýynsha, «Jurabek Laboratories» JShS shyǵarylatyn «Spýtnık V» vaktsınasynyń 1 jáne 2 komponentteriniń alǵashqy 260 500 dozasy sanıtarlyq-epıdemıologııalyq qadaǵalaý men qoǵamdyq densaýlyq saqtaý qyzmetine tapsyryldy.

Bul Ózbekstanda óndirisi jolǵa qoıylǵan ekinshi vaktsına. Buǵan deıin osy kompanııa qytaı-ózbek ǵalymdary birlesip jasaǵan ZF-UZ-VAC2001 vaktsınasynyń jalpy 7 mıllıon dozasyn shyǵardy, onyń 1 458 820 dozasy ekpe naýqanyna jetkizilgen.

Osylaısha, Ózbekstanda ekpe protsesinde qoldanylatyn vaktsına 28 473 528 dozany quraýda.

Olardyń:

· 460 myń doza «Spýtnık V»,

· 986 480 myń doza AstraZeneca,

· 13,5 mıllıon doza - ZF-UZ-VAC2001,

· 3 mıllıon 60 doza – Moderna,

· 1,2 mıllıon doza Pfizer/BioNTech vaktsınasy.