Ózbekstanda «Spýtnık V» vaktsınasynyń ekinshi komponenti tapshy bolyp otyr

TAShKENT. QazAqparat – Ózbekstan Respýblıkasynda «Spýtnık V» vaktsınasy ekinshi komponentiniń tapshylyǵy bar, dep habarlaıdy QazAqparattyń menshikti tilshisi.

Ózbekstan Densaýlyq saqtaý mınıstrliginiń málimetinshe, respýblıka búginge deıin reseılik preparattyń 370 myń dozasyn alǵan, sonyń ishinde birinshi komponent – 230 myń doza, ekinshi komponent – 140 myń doza bolǵan.

«Qazirgi kezde birinshi dozany 212 818 adam alǵan, ekinshi komponent 128 442 adamǵa salyndy. Qos komponent sanyn teńestirý úshin elge vaktsınanyń áli 90 myń dozasy jetkizilýi tıis. Aldaǵy kúnderi Ózbekstan «Spýtnık V» vaktsınasy ekinshi komponentiniń 90 myń dozasyn alatyny kútilip otyr», - dep habarlady vedomstvonyń baspasóz qyzmetinen.

Mınıstrlikte reseılik preparatty qabyldaý arasyndaǵy ýaqyt jıiligin 21 kúnnen 90 kúnge deıin uzartýǵa bolatynyn qosyp ótti.

Eske sala ketsek, shilde aıynyń sońynda Ózbekstandaǵy «Jurabek Laboratories» zaýytynda «Spýtnık V» vaktsınasy birinshi komponentiniń birinshi partııasy quıylǵan.

Birinshi kezeńde reseılik shıkizattan jasalǵan preparattyń 2 mıllıonǵa deıin dozasyn óndirý josparlanyp otyr.

Keıinnen atalǵan preparat óndirisiniń tolyq tsıkly retke keltiriledi.