Ózbekstanda sottalǵandar joǵary oqý oryndaryna túsip, onlaın bilim ala alady
ASTANA. KAZINFORM — Ózbekstanda 2027/2028 oqý jylynan bastap túzeý mekemelerinde jazasyn ótep jatqan azamattar joǵary oqý oryndaryna túsip, aqyly negizde onlaın oqı alady.
Ózbekstan prezıdentiniń qaýlysyna sáıkes, jańa sharalar sottalǵandardyń bilim alyp, kásibı daıarlyqtan ótý múmkindigin keńeıtýge, sondaı-aq bostandyqqa shyqqannan keıin qoǵamǵa beıimdelýine baǵyttalǵan.
Bılik 2027/2028 oqý jyly bastalǵanǵa deıin túzeý mekemelerinde 310 oqý kabıneti men 420 tájirıbelik kabınet ashýdy josparlap otyr. Sondaı-aq 2030 jylǵa deıin eńbek naryǵynda suranysqa ıe keminde 50 mamandyqty meńgerýge arnalǵan baǵdarlamalar engiziledi.
Buǵan qosa qashyqtan oqytý úshin túzeý kolonııalarynda beınebaılanys quraldarymen jabdyqtalǵan arnaıy kabınetter ashylady.
Sonymen qatar jyl saıyn keminde 15–20 myń sottalǵan azamatty kásibı daıarlyqtan ótkizý josparlanyp otyr. Bılik bul sharalar qylmysty qaıta jasaý deńgeıin 30 paıyz tómendetýge múmkindik beredi dep kútedi.
Budan bólek kolonııalarda jastarǵa arnalǵan qosymsha baǵdarlamalar da engiziledi. Jas sottalǵandar arasynan daýys berý arqyly belsendiler tańdalyp, olarǵa toqsan saıyn bazalyq eseptik mólsherdiń úsh eselengen kóleminde syıaqy beriledi.
Buǵan deıin Ózbekstanda kitap oqyǵany úshin áskerdegi qyzmet merzimi qysqarýy múmkin ekeni habarlanǵan bolatyn.