Ózbekstanda shetel azamattary avıabıletti sheteldik valıýtamen satyp alatyn bolady
ASTANA. 5 tamyz. QazAqparat - Osy jyldyń 5 tamyzynan bastap Ózbekstanda shetel azamattary ishki jáne halyqaralyq reısterge avıabıletti sheteldik valıýtamen satyp alatyn bolady.
Sársenbi, 3 tamyz kúni Ózbekstan úkimeti osyndaı málimdeme jasady, dep habarlaıdy Golos Amerıkı.
Jańa erejege sáıkes, avıabıletter satyp alatyn sheteldik azamattar Ózbekstanda ózbek somymen emes, shetel valıýtasymen esep aıyrysýy qajet. Alǵashqy ushý núktesi Ózbekstan aýmaǵynan tysqary bolsa, el azamattary da avıabıletterdi shetel valıýtasymen satyp alýy tıis.
Ózbek aqparat agenttiginiń habarlaýynsha, osy erejeni buzǵan avıakompanııalar men agenttikterge bılettiń tolyq quny kóleminde aıyppul tóleý qarastyrylǵan. Aıyppuldar memleket bıýdjetine aýdarylatyn bolady.
