Ózbekstanda saılaýǵa elektorattyń 87 paıyzynan astamy qatysty - Ortalyq saılaý komıssııasy
TAShKENT. Jeltoqsannyń 28-i. QazAqparat /Qurmat Samarhan/ - Ózbekstanda ótken saılaýda saılaýshylardyń 87 paıyzdan astamy daýys berdi. Bul týraly jeksenbi, jeltoqsannyń 27-sinde ótken qorytyndy brıfıngte Ózbekstan Respýblıkasy Ortalyq saılaý komıssııasynyń tóraǵasy Myrza-Ulyqbek Ábdýsalomov habarlady.
Komıssııa basshysy habarlaǵandaı, jeltoqsannyń 27-si kúni saǵat 20.00-da Olıı Majlıstiń Zań shyǵarýshy palatasyna depýtattar saılaý jónindegi barlyq ýchaskeleri men memlekettik bıliktiń jergilikti ókiletti organdarynda daýys berý sharalary aıaqtaldy.
M.Ábdýsalomovtyń aıtýynsha, aldyn-ala málimetter boıynsha, saılaýǵa shamamen 15 mıllıon 108 myń 950 saılaýshy qatysqan, bul tizimge engen barlyq saılaýshynyń 87,8 paıyzyn quraıdy. «Osylaısha, «Ózbekstan Respýblıkasy Olıı Majlısine saılaý týraly» Zańnyń 44-shi babyna sáıkes Parlamenttiń Zań shyǵarýshy palatasyna depýtattar saılaý ótti dep sanalady», dep atap kórsetti ol.
Dúısenbi, jeltoqsannyń 28-i kúni ótetin baspasóz máslıhatynda Olıı Majlıs Zań shyǵarýshy palatasyna depýtattar saılaýdyń aldyn-ala qorytyndysy jarııa etiledi dep josparlanýda.
