Ózbekstanda Sardoba sý qoımasynyń bógeti jarylyp, turǵyndar evakýatsııalandy
GÚLІSTAN. QazAqparat - 1 mamyrda nóser jańbyr jaýyp, qatty jel soǵýy saldarynan Ózbekstandaǵy Sardoba sý qoımasynyń bógeti jarylyp ketken. Eldi mekenderge, kommýnıkatsııalyq jelilerge, egistikterge zaqym kelgen, dep habarlaıdy «QazAqparat» HAA Ózbekstannyń ulttyq aqparat agenttigine silteme jasap.
Sý qoımasyna jaqyn mańdaǵy mahallalardyń turǵyndary evakýatsııalanyp, mektepterge, kolledjderge, kásiporyndarǵa ornalastyryldy. Olardyń bir bóligine basqa mahallalardyń turǵyndary pana boldy.
El Prezıdenti Shavkat Mırzıeev apat bolǵan jerge kelip, qaýipsiz jerge kóshirilgen turǵyndarmen júzdesti. Ol barlyq japa shekken adamdarǵa kómek kórsetiletinin, baspanamen, azyq-túlikpen qamtylatynyn atap ótti.
Sondaı-aq, úkimettik komıssııa qurylyp, apattyń zardabyn joıý sharalary qolǵa alyndy. Qazirgi sátte bógetten sý aǵýy toqtady. Arnadan asqan sý Aqaltyn aýdanyndaǵy Abaı kanalymen Jızaq oblysyndaǵy Arnasaı kóline aǵyzyldy.
