Ózbekstanda Sardoba sý qoımasyndaǵy bógettiń buzylýyna qatysty qylmystyq is qozǵaldy
TAShKENT. QazAqparat – Sardoba sý qoımasyndaǵy bógettiń buzylýynan bolǵan sý tasqynyna baılanysty Ózbekstanda qylmystyq is qozǵaldy, dep habarlaıdy QazAqparattyń menshikti tilshisi.
Ózbekstan Bas prokýratýrasy Telegram arnasynyń habarlaýynsha, ÓR Qylmystyq kodeksiniń 207-bap 1-bóligi (laýazymdyq nemquraılylyq) men 258-bap 2-bólimi «b» tarmaǵy (taý-ken, qurylys nemese jarylys qaýpi bar jumystardyń qaýipsizdik qaǵıdalaryn buzý) boıynsha qylmystyq is qozǵaldy.
Sonymen qatar tergeý jumystaryn júrgizý Ózbekstan Memlekettik qaýipsizdik qyzmeti organdaryna júktelgen.
Aıta ketsek, 1 mamyr kúni Ózbekstandaǵy Sardoba sý qoımasyndaǵy bógettiń bir bóliginen sý aǵyp, Ózbekstan Respýblıkasy Syrdarııa oblysyndaǵy eldimekenderdi sý basty. Kórshiles eldiń oblys basshylary sý qoımasyndaǵy sý kólemin azaıtý úshin sý baǵanyn Qazaqstanǵa buryp jibergen. Sonyń saldarynan Qazaqstan Respýblıkasy Túrkistan oblysy Maqtaaral aýdanyndaǵy birneshe shekara kollektorlaryna sý tolǵan. Sý deńgeıi kóterilgendikten Maqtaaral aýdany shekarasyndaǵy kollektordaǵy sý tasydy.
Ózbekstan Respýblıkasy Syrdarııa oblysyndaǵy Sardoba sý qoımasy 2017 jyly paıdalanýǵa berilgen. Sý qoımasynyń syıymdylyǵy 922 mıllıon tekshe metr sýdy quraıdy. Onyń qurylysy 2010 jyly Ońtústik Myrzashól arnalarynyń ortalyq jelisi aımaǵynda bastalǵan.
Eske sala keteıik, keshe Ózbekstanda Sardoba sý qoımasynyń bógeti jarylyp, eldi mekender, kommýnıkatsııalyq jeli, egistikke zaqym kelgen. Sonyń saldarynan Túrkistan oblysynda 4 aýyldy sý basyp, 620 úı búlindi. Maqtaral aýdanynda 2 mamyrda túngi 00:00-de tótenshe jaǵdaı jarııalandy.
Avtory Mıras Qýandyqov
