Ózbekstanda Sardoba sý qoımasyna qatysty qylmystyq is boıynsha eki kúdikti qamaýǵa alyndy
TAShKENT. QazAqparat - Ózbekstan Reýspýblıkasynyń Bas prokýratýrasy Sardoba sý qoımasyna qatysty qylmystyq isti tergeý barysy jóninde resmı málimet taratty, dep habarlaıdy QazAqparat vedomstvonyń Telegram-daǵy paraqshasyna silteme jasap.
«Syrdarııa oblysynyń Sardoba sý qoımasyna qatysty qylmystyq is boıynsha tergeý sharalary júrgizilýde. Qazirgi kezde atalǵan qylmystyq is boıynsha eki adam kúdikti dep tanyldy, olarǵa qatysty «qamaýǵa alý» bultartpaý sharasy qoldanyldy.
Shyndyqty anyqtaýǵa kedergi týyndamaýy úshin is boıynsha oǵan qatysty basqa da mán-jaılary aıtylmaıdy», delingen habarlamada.
Vedomstvonyń málimetinshe, qazir tergeý amaldary aıaqtalmaǵan.
Osy apatqa baılanysty qylmystyq is 3 mamyrda qozǵalǵan bolatyn.
Eske sala keteıik, 2 mamyrda Ózbekstanda Sardoba sý qoımasynyń bógeti jarylyp, eldi mekender, kommýnıkatsııalyq jeli, egistikke zaqym kelgen. Sonyń saldarynan bir kúnniń ishinde Túrkistan oblysynda 4 aýyldy sý basyp, 620 úı búlindi. Maqtaral aýdanynda 2 mamyrda túngi 00:00-de tótenshe jaǵdaı jarııalandy.
Aıta keterligi, Sardoba sý qoımasyna tehnıkalyq aýdıt júrgiziledi, oǵan Qazaqstan tarapy da qatysady.
