Ózbekstanda salynatyn AES-tiń quny 2 mlrd dollardan aspaıdy
TAShKENT. KAZINFORM – Ózbekstanda boı kóteretin az qýatty AES-tiń quny 2 mlrd dollardan az bolady, dep habarlaıdy Kazinform agenttiginiń menshikti tilshisi.

Jobanyń quny týraly Alter Ego arnasyna suhbat bergen Uzatom agenttiginiń dırektory Azım Ahmedhadjaev málim etti.
- Stantsııanyń quny 2 mlrd dollardan az bolady. Bul biz jobalap otyrǵan meje. Men naqty ári túpkilikti qansha qarajat jumsalatynyn ázirge aıta almaımyn. Óıtkeni, bul baǵytta áli de jumys júrgizip jatyrmyz, - dedi Azım Ahmedhadjaev.
Onyń aıtýynsha, agenttik qazirgi ýaqytta artyq shyǵyndardy qysqartýǵa ekpin qoıyp jatyr. Osylaısha, búginge deıin AES salý jobasy aıasynda 300 mln dollar únemdelgen.

Azım Ahmedhadjaevtyń málimetinshe, qurylysqa Reseı tarapynan aqsha tartpaı, onyń ornyna AES-ti sheteldik ınvestıtsııa, jeńildikpen usynylatyn qytaılyq nesıeler esebinen qarjylandyrý josparlanyp otyr. Bul rette memlekettik bıýdjet barynsha az paıdalanylmaq.
Eske salaıyq, Ózbekstanda reseılik tehnologııa boıynsha óńirdegi alǵashqy az qýatty atom elektr stantsııasy salynady. Árqaısysynyń qýaty 55 MVt bolatyn 6 reaktor (jalpy qýaty – 330 MVt) Djızak oblysyndaǵy Týzkan kólinde boı kóteredi. AES-tiń alǵashqy reaktory 2029 jyldyń sońynda iske qosylmaq. Al ol tolyq qýatta 2033 jyldan bastap jumys isteıdi dep josparlanǵan.
Osyǵan saı, taıaýda Ózbekstan men Reseı AES salý kelisimshartynyń kúshine ený hattamasyna qol qoıdy.
Sonymen qatar, AES salý úshin halyqaralyq konsortsıým qurylady.
Buǵan qosa, taıaýda Kazinform agenttigine suhbat bergen Uzatom agenttiginiń dırektory Azım Ahmedhadjaev alǵashqy ýaqytta Ózbekstan ıadrolyq otyn qaldyǵyn salynatyn AES-tiń aýmaǵynda saqtaıtynyn málim etti.