Ózbekstanda salynatyn AES eldiń úsh óńirin elektr qýatymen qamtamasyz etedi

TAShKENT. KAZINFORM — Ózbekstanda salynyp jatqan AES Jızaq, Samarqand jáne Naýaı oblystaryn elektr energııasymen qamtamasyz etýge qaýqarly bolady, dep habarlaıdy Kazinform agenttiginiń menshikti tilshisi. 

Bul týraly «Oʻzbekiston 24» telearnasyna suhbat bergen Uzatom agenttiginiń dırektory Azım Ahmedhadjaev málim etti. Onyń aıtýynsha, AES atalǵan úsh óńirdegi ónerkásipti jáne aýyl sharýashylyǵyn damytýǵa serpin bermek. Sondaı-aq, tabıǵı gaz ımportyna táýeldilikti azaıtyp, ekologııalyq taza jolmen óndiriletin energııa qýatynyń kólemin arttyrady.

Aıta keteıik, Ózbekstanda az qýatty AES-tiń alǵashqy betony 2026 jyly naýryzda quıylady. Buǵan deıin strategııalyq nysanǵa árqaısysy 55MVt 6 reaktordy (jalpy qýaty 330MVt) ornalastyrý josparlanǵan. Endi olardyń sany ekige deıin qysqarady, tıisinshe onyń qýaty 110MVt-pen shekteledi. Sonymen qatar, belgilengen alańǵa, ıaǵnı Týzkan kóline taǵy bir iri atom stantsııasy salynady. Onyń enegrııa óndirý qaýqary 2000MVt bolmaq.

Uzatom agenttiginiń osy kezge deıin jasaǵan esepteýine sáıkes, az qýatty AES-tiń quny 2 mlrd dollarǵa baǵalanǵan. Endi jobaǵa engizilgen ózgeristerge baılanysty, ıaǵnı rekatorlar sanynyń qysqarýyna oraı shyǵyn 1 mlrd dollardan az bolmaq.

Ózbekstan men Reseı iri AES salý jobasyn áli tolyq kelisken joq. Resmı Tashkent bul baǵyttaǵy kelissózderdi 2026 jyldyń naýryzyna deıin aıaqtalýdy josparlap otyr. Onyń somasyna qatysty naqty derekter joq.

Eske salaıyq, taıaýda Ózbekstanda atom elektr stantsııasy qurylysynyń birinshi kezeńi bastalǵanyn jazyp edik. Munymen birge, kórshiles elde AES qurylysy boıynsha qoǵamdyq tyńdaý ótedi.

Buǵan deıin habarlaǵanymyzdaı, Reseı Ózbekstanda taǵy bir AES salady.

Qosa ketsek, taıaýda Qazaqstan halqyna Joldaýyn jarııalaǵan Prezıdent Qasym-Jomart Toqaev elde birneshe AES salý bastamasyn kótergen bolatyn. Tıisinshe, 25 qyrkúıekte alǵashqy AES-ke úzdik ataý berý konkýrsy bastaldy.