Ózbekstanda rekord úshin palaý pisirý oqıǵasynan daý shyqty
ASTANA. QazAqparat - Tashkenttiń ortalyǵynda Gınnes rekordtar kitabynyń ókilderiniń qatysýymen ótken álemdegi eń úlken palaý pisirý is-sharasynyń sońy daýǵa ulasty, dep habarlaıdy Ts-1 portaly.
Buǵan deıin habarlanǵandaı , 50 aspaz bir qazanda 7 tonna 360 keli palaý pisirip, jetistikterin Gınnestiń rekordttar kitabyna jazdyrǵan edi. Ala shapandy aǵaıyndardyń ulttyq asy 8 qyrkúıek kúni «Ózbegim» (O'zbegim) dep atalatyn dástúrli mádenı festıval kezinde ázirlendi.
Palaýdy taratý orny aldyn ala durys uıymdastyrylmaǵandyqtan, kezek kepteliske aınaldy. Qonaqtar bul palaýdan birinshi bolyp dám tatqylary kelip, úlken qazandardy atoılap alǵa umtylǵan. Jınalǵan jurttyń arasynda balalar da bolǵan.
Basqarýǵa kónbeıtin jurt jolynda kezdesken zattardy qıratyp ótken. Sol kúni-aq áleýmettik jelilerde ózderinen keıin taý bolyp úıilgen qoqys pen ezip tastaǵan jemis-jıdekterdiń vıdeo jazbasy tarap ketti.
