Ózbekstanda referendýmǵa qatysatyn saılaýshylar tizimine 600 qazaqstandyq endi
TAShKENT. KAZINFORM – Ózbekstan astanasynda ornalasqan Qazaqstan elshiliginiń janyndaǵy referendým ýchaskesinde AES qurylysy jónindegi referendýmǵa belsendi daıyndyq júrip jatyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
«Respýblıkalyq referendýmǵa qyzý daıyndyq júrip jatyr. Eki daýys berý kabınasy men jáshikter qoıyldy. Saılaýshylardyń tizimi negizinde tirkeýge alynǵan 600 qazaqstandyq bar. Shet memleketterdegi eń iri referendým ýchaskeleriniń biri Tashkentte ornalasqan. Buǵan qosa, múmkindigi shekteýli azamattardyń úıde tańdaý jasaýy úshin jaǵdaı jasalyp, jyjymaly jáshikterdi jetkizetin toptar jasaqtaldy. Degenmen ázirge mundaı ótinish túspedi. Jalpy, Ózbekstandaǵy barlyq Qazaqstan azamattarymen baılanystamyz», - dedi №399 ýchaskelik saılaý komıssııasynyń tóraǵasy Jaslan Iskakov.
Onyń atap ótýinshe, № 399 referendým ýchaskesine Tashkenttegi joǵary oqý oryndarynda oqıtyn stýdentter, Ózbekstanda ýaqytsha jumys isteıtin jáne turatyn otandastarymyz, qazaqstandyq týrıster men issaparda júrgen azamattar keledi dep josparlanyp otyr.
Aıta keteıik, Tashkenttegi №399 referendým ýchaskesi Qazaqstan Respýblıkasynyń elshilgi ǵımaratynda (Abaı kóshesi, 1) ornalasqan. Onda daýys berý jergilikti ýaqyt boıynsha saǵat 7:00-de bastalyp, 20:00-de aıaqtalady.
