Ózbekstanda prezıdenttik saılaý ótip jatyr
ASTANA. QazAqparat - Jeksenbi kúni Ózbekstanda prezıdenttik saılaý ótip jatyr. Bul laýazymǵa tórt saıası partııasynyń kandıdatýralary úmitti, dep jazady Bı-bı-sı.
Negizgi úmitker - qazirgi memleket basshysy Islam Karımov. Ol eldi 25 jyl qatarynan basqaryp keledi. Bul kandıdatýrany Ózbekstannyń lıberaldy-demokratııalyq partııasy usyndy.
Ózbekstannyń halyqtyq-demokratııalyq partııasy bul orynǵa Ortalyq keńes tóraǵasy Hatamjon Ketmonovty, "Mıllıı tıklanısh" Demokratııalyq partııasy - parlamenttegi partııa fraktsııasynyń múshesi Akmal Saıdovty, "Adolat" sotsıalıstik-demokratııalyq partııasy - partııa atqarýshy komıtetiniń tóraǵasy Narımon Ýmarovty usyndy.
Eldiń 20,79 mıllıon azamaty daýys bere alady. Saılaý sátti ótkenin moıyndaý úshin saılaýshylardyń 33% daýys berýi tıis. Saılaýdy shamamen 80 myń jergilikti baqylaýshy jáne 300-ge jýyq halyqaralyq baqylaýshy qadaǵalaıdy.
